وعد الرجال
شراعنا منصوب من فوق الدقل
مصرور ومكن معي زين الحبال
أنا صارع الامواج و كبيرة هول
ترشخ في الصمبوق خايلها جبال
صابر على بحري و لا حب الكسل
بانوصل الميناء ولافي شي محال
بعض في البحرة يحيكون الحيل
ضدي ومن خلفي بغوا ثروه ومال
و اللي معاهم هم يخربون العمل
ماشي فوائد من خبيثين الاعمال
صبرك شويه بايقع مليون حل
لبسي من الغالي حطيطاد الدبال
خليك فترة باتشوف الشهر هل
و البدر كامل بايقع بعد الهلال
مدام نحن يد وحده في المحل
بانبني الخارب و با ناكل حلال
ماتحسي الا مركبك قالوا وصل
حيا ليالي الانس وايام الوصال
والثقة وحده رجل قابل رجل
الوعد مانخلفه هو وعد الرجال